Dicaritoan dek: Afri Meldam

 

Duo pakan ndak bisa karajo, kapalo Sutan paniang co naiak kudo-kudo baputa di Dufan. Yo, baa ka indak, alah ampia duo pakan inyo ndak bisa pai karajo. Biasonyo walaupun serabutan lai ado juo ciek duo klien nan dapek dek nyo, nan namuah bakarajo samo jo inyo manjua barang-barang sagalo macam, mulai dari sambalado ikan teri sampai sarawa kotok. Lapak bininyo pun langang kini karano dak ado urang nan barani kalua lamo-lamo, apolai pai mambali baju ka pasa tampek bininyo manggaleh baju tigo saratuih.

Dek lah tatumbuak pangana e, takana lah dek Sutan kawannyo samo-samo parantau nan tingga di Depok. Tasman, kawannyo tu, kalau ndak salah mambuka usaho sablon di sinan, lumayan maju usahonyo. Mungkin ikolah wakatunyo awak manguji sia nan dunsanak, sia ndak basipakak, kecek Sutan dalam hati.

“Eh Angku mah! Lah lamo dak manalepon, ado angin apo ko?” Suaro sarak Tasman tadangan di subarang.

“Ka baa bana lah kaba kini ko, lai masih barangok se basyukur wak. Dak baitu?” baleh Sutan pulo.

“Barek bana lo nampak dek den kaji kini mah,” garah Tasman.

“Baa kok ka indak, kawan. Alah duo pakan ko indak ado pitih masuak. Lah bakikih isi dompet sadonyo…”

“Ndeh, yo tu lah, Ngku. Lah payah manyabuik a kini,” baleh Tasman, satonyo lo mangaluah. Mungkin nyo jago-jago bia Sutan ndak maminjam piti ka inyo.

“Lai lancar usaho sablon kini tu?”

“Sia nan ka mamikian sablon kini, Ngku? Di siko lah bakuruang co buruang se sadonyo sapanjang hari. Patang ko lai ado calon bupati nan ka mamasan agak banyak rencananyo, e tapi ndak jadi gara-gara pilkada diundur dek korono ko…” Tadanga bunyi angok Tasman dek Sutan.

Baca juga :  Takicuah di Nan Langang

“Yo lah samo kariang saku-saku nampaknyo mah,” kecek Sutan, “Eh dak baitu do,” dek Tasman sabanta ko mangecek partai, takanalah dek Sutan kalau di Jakarta ado urang kampuang nan lah jadi urang di rantau. Hendra Canto namonyo. Masih jauah umuanyo di bawah Sutan. Tapi dari kaba nan di danga-danga Sutan, Hendra ko lah jadi staf ahli di Senayan. Ndak tangguang-tangguang, kawannyo urang gadang sadonyo, itu carito urang-urang. Yo hebat bana anak tu! “Kok pai manamui si Hendra Canto kito bisuak baa nyo?”

“Sia tu?”tanyo Tasman.

“Ee, tu lah manyablon ka manyablon se karajo ang di Depok tu. Urang hebat dari kampuang awak se ndak kenal!”

“Banyak den kenal urang hebat di siko nyo, Ngku!” Ndak namuah kalah lo si Tasman ko.

“ Ndak itu intinyo kini doh. Pokoknyo namuah ang ndak bisuak kito pai manamui si Hendra tu? Mungkin ado solusi dari nyo bisuak. Mode ko se taruih namuah wak mati ndak makan di rantau ko nyo!”

“Jadilah. Di stasiun Karet se kito basobok bisuak jam lapan. Lai suai tu, Ngku?”

“Aden stenbai taruih dang nyo…”

BISUAKNYO, pailah Sutan jo Tasman tu ka Senayan. Turun dari ojek di muko gedung DPR tu, langsuang kaduonyo bauru-uru masuak. Tantu lah dicegat dek sekuriti nan babaris di muko tu, “Maaf, bapak-bapak, ada keperluan apa ya?” tanyo sekuriti tu.

“Ini kami ada janji bertemu dengan adik kami yang bekerja di sini ha,” baleh Sutan, agak baduto stek.

Baca juga :  Parangai Si Iwan

“Janji di mana, Pak? Gedung apa?” tanyo sekuriti tu ciek lai.

Manggaruik kapalo si Sutan dibueknyo. “Lupa dia menyebutkannya kemaren itu. Tapi kantornyo itu yang paling tinggi itu ha,” baleh Sutan asa malantuang.

Dek maleh baurusan lamo-lamo, disurahlah dek sekuriti urang baduo tu masuak. Salasai cek suhu badan jo mambasuah tangan, malengganglah Sutan jo Tasman ka gedung baatok ijau co daun pisang tuo tu.

“Yo lai tau Angku tampek karajo Hendra tu?” tanyo Tasman sambia bajalan.

“Lai bakawan den jo inyo di fesbuk. Lah den hubungi nyo tadi malam. Kok lun nyo baco, den lah caliak-caliak foto di fesbuknyo. Beko kito tanyo se ka urang di dalam, di ma kantuanyo tu…”

Antah dek untuang elok antah dek urang sadang langang, baru tibo Sutan jo Tasman di muko gedung Nusantara duo, barantilah oto sedan tapek di muko urang tu. “Langkah kanan mah! Itu nyo si Hendra tu!” sorak Sutan mancaliak paja nan baru kalua dari pintu muko.

“E yo bana tu, Ngku?” tanyo Tasman, raso-raso ndak picayo mandanga e.

“Iyo. Ko ha den imbau nyo! Hen! Hendra!!!” Yo bana gadang hati Sutan bisa basobok jo Hendra tu di sinan. Yo gagah staf ahli tu nampak dek nyo babaju batiak jo sarawa basandiang.

Mandanga namanyo dipanggia, mancaliak lah si Hendra tu. Nampak dek nyo Sutan malambai-lambaian tangan sambia bajalan mandakek. Baru ajo Hendra mambukak pintu balakang, tibolah Sutan di sinan. “Hendra, iko ambo, Sutan. Lai masih takana?”

Baca juga :  Malam Minggu di Kadai Miso Tek Suna

“Lai. Da Sutan mamaknyo Idar ndak?” baleh Hendra samantaro tangannyo masih di pintu.

“Syukurlah lai takana jo ambo. Ambo kamari jo si……..”

Alun salasai Sutan mangecek, tadanga urang mandehem dari dalam oto. Pucek muko si Hendra langsuang. Nyo bukak pintu tu capek-capek. “Kok lama banget?” kecek apak-apak nan baru kalua dari oto sedan tu ka si Hendra.

“Maaf, Pak. Maaf….” jawek si Hendra. Masih pucek bana mukonyo nampak dek Sutan. Siap tu si Hendra bagageh maambiak tas jo map-map dari dalam oto. Apak-apak tadi malenggang se bajalan ka arah Tasman sadang tagak.

“Sia paja tu tu? Sombong bana lo nampak dek den!” Tabik berang Sutan.

Ndak dijawek dek Hendra do. Nyo bajalan capek-capek mangaja apak-apa tadi. “Bisa uda tunggu sabanta siko?” keceknyo sambia jalan ka Sutan. “Iko ado rapek sabanta lai……”

“Hen…Hen! Tas saya mana? Sini, sini, bawa sini cepetan!” Hariak apak-apak tadi tu ka si Hendra. Tambah tagopoh-gopoh lah Hendra balari ba sinan manjinjiang tas jo mangapik map di katiaknyo.

Sutan jo Tasman tacangang se mancaliaknyo nyo.

“A karajo si Hendra tu sabana e tu, Ngku?” tanyo Tasman.

“Kecek urang di kampuang, inyo ko staf ahli.”

“Staf ahli baa lo karajo e mambuka pintu jo manjianjiang-jinjiang tas tu tu?”

“Ntahlah. Ahli manjinjiang tas mungkin!” baleh Sutan.

“Baa lai ko? Yo ka wak tamui juo staf ahli manjinjiang tas tu?” Tasman mancamieeh.

“Paniang palo den!” jawek Sutan sambia duduok co urang ele di muko gedung DPR tu. ***