Dicaritoan dek AFRI MELDAM

 

Galak-galak cameh si Iwan mambaco pengumuman rektor nan dibagikan kawan-kawannyo di grup WA. Dek manimbang situasi nan samakin ndak takandali dan untuak mencegah bia ndak batambah banyak se urang nan kanai virus korona, rektor lah mamutuihan kalau mulai bisuak sampai akhia bulan kegiatan perkuliahan dilakukan dari jarak jauah se. Kuliah onlen, baitu istilahnyo.

Iwan galak tantu dek hatinyo sanang mandanga kaba tu. Baa pulo ndak ka sanang nyo, duo minggu ndah usah datang ka kampus, bisa golek-golek se di kos sambia main gim atau bukak fesbuk. Tugas kuliah mungkin akan ado diagiah dek dosen-dosen, tapi itu urusan geleng tu nyo, pikia Iwan.

Tapi Iwan pun sabananyo yo cameh pulo dek mancaliak situasi kini ko. Capek se rasonyo virus korona ko tibo di Indonesia, dan kabanyo alah banyak pulo nan dalam pemantauan di Padang ko. Lamo-lamo di Padang bisa-bisa awak pulo nan kanai beko lai mah, keceknyo dalam hati.

Sabanae dek rektor alah dikecekan kalau mahasiswa ndak buliah pulang kampuang untuak samantaro, tapi tibo-tibo se Iwan maraso kalau inyo ndak bisa lamo-lamo di Padang lai doh. Nyo harus pulang hari ko juo.

“Ma, Iwan pulang beko yo.” Nyo hape Amanyo langsuang.

“Pulang baa lo. Ang kan kuliah….” bangkak lansuang kalang Amanyo.

“Ndak mancaliak Ama barita di tipi? Lah banyak urang maninga dek korona.”
“Tantu dek den nyo. Tapi di Padang kan lai masih aman-aman se. Ndak ado nampak dek den kawan-kawan samo kuliah ang nan baliak kampuang doh! Alasan ang se tu nyo!” tegas Amanyo.
“Alasan apo lo. Pokoknyo wak pulang beko!” Ditutuik dek Iwan lansuang hapenyo sabalun Amanyo maagiah caramah baliak.
Iwan ko memang lah sipaiknyo mode tu dari ketek. Dek anak bungsu, sagalo kaandak jarang diindakan dek urang gaek, mangko tabiasonyo sampai gadang. Tapek bana bak kecek urang, ketek taraja-raja, gadang tabawo-bawo, lah gaek jadi mantiko!
Jadi, kalau keceknyo ka pulang, yo inyo pasti ka pulang. Ndak ka bapikia duo kali nyo tu lai.
Salasai makan siang di kadai muko kos, nyo lansuang mamilin gas honda e kancang-kancang. Sabanta se lah tibo nyo di Sitinjau Lawik, taruih ka Solok, malaju ka Muaro Kalaban, babelok ka Tanjung Mpolu. Dek paruik lapa jo sasak ka jamban, singgah lo nyo sabanta di pasa di sinan. Kebetulan bana nyo basobok jo Ni Dar, kakak Irna, nan baru baliak maanta paket langkok-langkok untuak dikirim ka Jakarta.
“Eh Iwan. Surang se?” tanyo Ni Dar babaso-basi.
“Iyo, Ni. Ma Da Jamil nyo?” tanyo Iwan pulo.
“Tu di kadai sabalah, ado nan nyo bali. E baa kok pulang, lah libur kuliah tu?”
“Kuliah onlen kini Ni. Dek virus korona ko…”
“Oo rancaklah tu lai bisa kuliah onlen.Tapi di kampuang kini acok……”
Alun salasai Ni Dar mangecek lai, hape Iwan babunyi. Telepon dari Amanyo. “Yo jadi ang pulang kini?”
Sabananyo panek-panek se Amanyo batanyo mode tu ka si Iwan. Nyo tantu lah paham bana baa parangai anaknyo tu.
“Iyo, ko ha lah di Tanjuang Mpolu wak kini…”
“Ee nasib elok bana mah. Ang balian dagiang agak sakilo di pasa tu sakalian. Apa ang taragak makan kalio dagiang kecek e dari patang.” Yo bana mantap lo Amanyo manyuruah Iwan.
“Tadi balarang-larang wak pulang, kini Ama suruah mambali dagiang…”
“Kan dek ang masih di situ mah. Kok lah tibo ang di Sipuah dak ka den suruah ang mambalian doh!”
“Pitih nyo baa?”
“E lah abih se kiriman balanjo kapatang ko? Tambuak saku-saku ang?”
Pitih nyo sabana e masih cukuik untuak bali dagiang sakilo. Tapi nyo ka mambalian sesuatu untuak Irna rencananyo. Apel atau pir, buah kesukaan Irna. “Bara lo bali a tu?” Nyo cameh pitihnyo beko ndak cukuik lai untuak mambalian oleh-oleh untuak Irna.
“Ang tanyolah ka tukang dagiang tu. Ma den tau!”
“Jadih, jadih!”
Dalam pado itu, tibolah Jamil, laki Ni Dar. “Iwan, ka samo jo kami ka ateh ndak? Ko kami ka pai lai,” keceknyo.
Manggeleng Iwan. “Duluan lah Da. Iko ado nan ka wak bali lu ha untuak Ama.”
***
Tibo di rumah, alun lapeh panek Iwan lai, lah babunyi lo hapenyo. Kini dari kawan kosnyo, Andra. “Bro, iko modem basingajoan batinggaan atau baa ko?”
“E tingga tu?!” takajuik sarok si Iwan mandanga modemnyo tatingga di Padang. Nyo bongka tasnyo capek-capek. Yo ndak ado kironyo modem tu tabawo dek nyo doh.
“Iyo. Ko di muko tipi ko nampak dek den tadi,” kecek Andra. “O iyo, lah baco grup kan? Bisuak awak kuliah onlen jo Pak Jun pakai Skype. Jam 8 pagi.”
“Baa kok mendadak se infonyo tu?” tambah panik lah si Iwan. Pak Jun dosen mata kuliah spiking. Semester patang nyo dapek D samo apak tu. Absen sakali se ndak bisa diampuni dek apak tu doh.
“Ndak mandadak doh. Lah dari siang tadi sabananyo nyo kecekan di grup. Ndak bro baco tadi?”
Ilang aka Iwan. Baa lai ko, keceknyo dalam hati. Jaringan internet di kampuang ndak ka bisa bagai untuak mamakai Skype tu doh. Mambuka fesbuk se kadang acok baputa-puta se jaringan a. Tadi se Iwan apdet status lamonyo mintak ampun, Kalau pakai modem biasonyo lai rancak jaringan internet a. Tapi modem tu bana nan tatingga di Padang!
“Ondeh Ma…. Apo doso Iwan, Maa?” pakiak si Iwan sambia baguliang-guliang mangana kalau nyo harus maulang kuliah spiking baliak tahun muko! ***

Baca juga :  Lamak dek Pak Wali Katuju dek Saku-saku Ambo...