Dicaritoan dek : Afri Meldam

 

Iduik di kampuang, pituah urang dulu-dulu lai masih juo balaku sampai kini: kaba baiak basampaian, kaba buruak bahamburan. Dek lamo jo lambek, sampai juo kaba tu di talingo Datuak Galinggang. Tasabuiklah dek kawan-kawan maotanyo di kadai kalau Zulfiansyah nan bagala Malin Barajo Surang alah resmi mandaftar untuak jadi calon bupati di pilkada bisuak ko. Samantaro wakilnyo kabanyo pengusaha nan punyo pabrik di Sumbar-Riau-Jambi.

“Iyo baitu nan katuju dek ambo. Lah ampia putiah lo rambuik ambo sadonyo, baru kini ado baliak calon bupati dari kampuang awak. Nan asli putra daerah awak,” kecek Bujang Itam, nan punyo kadai.

“Dak asa katuju se do, Jang. Yo kito dukuang basamo-basamo bisuak tu nyo anak-kamanakan kito tu. Jan sampai kalah lo suaro di kampuang wak surang,” baleh Ongik. Inyo ko masih taituang mamak dek Zulfiansyah, yo mamak-mamak jauh sabana e kok dikaji bana, tapi dek lai elok untuang kamanakan sasuku tantu badakek-dakekan hubungan ko.

“Itu lah barang jaleh tu nyo, Mak. Engak bana wak tu nyo kalau ndak mandukuang urang kampuang surang. Ndak baitu, Ngku?” tanyo Bujang Itam pulo ka Kotik Sampono.

“Kamanakan ambo tuh mah, Jang, si Zul tu. Baliak kampuang dak pernah ndak nyo silau ambo ka rumah. Lai ka mungkin ambo ndak ka mandukuang kamanakan surang?” kecek Kotik Sampono agek kareh stek. Hubungan nyo jo Zulfiansyah pun sabana e labiah panjang lo dari tali baruak lai, tapi dek kamanakan tu lai bapitih, bakumpalah tali tu sampai singkek sasingkek-singkeknyo.

Baca juga :  Jangan Main-main Pula Sama Gadih Minang ini, Kena Hati Kamu Nanti

“Bilo kiro-kiro mulai bagi-bagi baju, Mak?” sambuang Buyuang sambia mangacau kopinyo.

“E itu lo ang rusuahan. Tunggu se lah tanggal mainnyo!” tapacak aie salero Ongik mangecek tu dek paneh ka Buyuang.

“Surau jan sampai lupo suak, Mak. Atok lah tirih, lantai pun lah banyak nan rangkah nampak dek wak. Yo ka Mak Ongik jo Mak Kotik tu nyo kami sampaian. Tolong bana sampaian ka Zulfiansyah,” kecek Buyuang malanjuikan. Buyuang ko tau bana parangai mamak nan baduo tu. Harus disanjuang-sanjuang stek, harus diambuang-ambuang.

“Awak nan baradaik baagamo ko, surau tu lah nan paliang utamo nan wak pikian. Anak kamanakan kami tu urang cadiak pandai, agamonyo pun kuek. Lah dalam pikirannyo tu nyo pakaro surau tu.” Kambang kampih iduang Kotik Sampono mangecek tu.

“Itu yo pemimpin idaman tu mah, Mak. Yo katuju bana wak mah. Eh, Datuak Galinggang baa? Anok-anok se nampak dari tadi?” nyo lempa juo dek Bujang Itam bola tu ka Datuak Galinggang nan dari tadi manyuduik se sambie main hape.

“Apo tu?” tanyo Datuak Galinggang icak-icak ndak mandanga. Nyo latakan hapenyo di ateh meja.

“Datuak sibuk bana jo hape sampai ndak tadanga kami maota dari tadi. Iko ha, soal si Zulfiansyah. Baa pandapek Datuak?”

“Pandapek baa mukasuiknyo, Jang?” batanyo Datuak Galinggang sakali lai sambia mamikian jawaban nan tapek. Baa bia ndak ka tasingguang urang-urang di kadai, tautamo mamak-mamak Zulfiansyah tuh. Kok dijawek nan sabana e, yo ndak suko sabana e Datuak Galinggang kok Zulfiansyah mancalon jadi bupati.

Baca juga :  KPU Sumbar Inventarisir Permasalahan Tahapan Pilkada Lanjutan Pasca COVID-19

“Yo, dek Datuak lai banyak kawan urang-urang partai, tantu saketek banyak tahu dek Datuak peluang anak kamanakan kito ko,” sambuang Bujang Itam.

“Yo kok lai banyak sokongan dari urang-urang bisuak tantu lai gadang peluang nyo,” jawek Datuak Galinggang, lah mode pejabat-pejabat, baputa-puta ndak jaleh se. Nan inti pertanyaan Bujang Itam dak nyo jawek doh. “Eh, ndak baitu doh. Ambo ka pai manjapuik si Ros ka sikolah ha. Ado urusan saketek ka Muaro beko,” lanjuiknyo pulo sambia bagageh kalua dari kadai.

Di rumah, Datuak Galinggang angek surang mandanga rencana pencalonan Zulfiansyah tu. Bukan baa-baa, di sampiang inyo memang ado kasam samo keluarga Zulfiansyah nan kayo gadang tu, alasan lainnyo yo dek Datuak Galinggang alah manjadi tim sukses calon lain.

“Awak kini ko realistis se harusnyo mancaliak politik ko. Baa pulo si Zulfiansyah tu ka maju lo di pilkada bisuak. Ka jadi parami-rami alek se nyo bisuak tu nyo.” Nyo pilin rokok daun anaunyo sambia mancari-cari acara berita di tipi.

“Kan elok tu, Ngah. Ado calon bupati dari kampuang awak,” baleh si Ros, bininyo, sambia main fesbuk.

“Apolo elok e dek kau tu. Di kampuang se banyak urang ndak katuju samo inyo.” Paneh hati Datuak Galinggang mandanga komentar bininyo.

Baca juga :  Menurut Dinkes Padang, Banyak Warga "Salah Memahami" Hand Sanitizer

“Yo, tapi sayang juo kalau inyo ndak tapiliah bisuak. Bilo juo lai urang kampuang awak jadi bupati.”

“Ah suko-suko hati kau lah. Rancak manonton den lai daripado mangecek jo kau.”

“Berang se mah…” kecek bininyo.

“Iyo dek a Apa berang-berang ko?” Tibo pulo si Irna mandanga Apa jo Amanyo debat kusia.

“Anak ketek jan ikuik campua urusan urang gaek!”

Mambuduik si Irna lansuang. “Ndaklah. Ancak ka kamar lai. Fisikal distensing. Harus jauah-jauah dari virus. Apolai virus pamberang!” Nyo pagarahan Apanyo.

“Eee KTP tadi dima balatakan, Ir?” tanyo Amanyo sabalun Irna manutuik pintu kamar.

“Lah Irna baliakan ka laci di lamari kamar Ama,” jaweknyo sambia lalu.

Mandanga tu, Datuak Galinggang nan sadang asiak manonton tipi jadi penasaran. “KTP sia? KTP untuak a?” tanyonyo ka si Ros.

“Itu. Tadi nyo pai mampotokopi KTP awak jo Angah ka tampek si Des.”

“Untuak a kecek den?”

“Iyo, Ongik sadang mangumpuan KTP urang-urang kampuang. Keceknyo untuak bukti dukungan ka si Zulfiansyah. Si Irna nyo ajak jadi tim sukses di kampuang. Lumayanlah, takumpua 100 KTP dek Irna dapek lo tambah-tambah balanjo dek nyo. Makonyo awak pinjaman….”

Mancaliak panjang Datuak Galinggang ka si Ros. Tapi baa lai. KTPnyo alah masuak daftar namo pendukung Zulfiansyah, calon bupati nan nyo kecekan calon parami alek tadi. **