Dicaritoan dek: Afri Meldam

 

Sajak korona ko makin manjadi, Datuak Galinggang lah acok balamo-lamo di parak coklatnyo. Sabana e ndak lo banyak bana ndak nyo karajoan di sinan doh, tapi dek cameh juo nyo mandanga barito pakaro korona ko, yo nyo ado-adoan se karajo di parak. Mambarasian pangka coklat, manabeh samak, maagiah pupuak, jo mambuang buah coklat nan busuak.

Tapi siang tu, dek inyo langsuang se ka parak dari kadai Bujang Itam, dan inyo ndak sempat makan apo-apo dek bagageh mailakkan Ongik nan gilo maota Zulfiansah nan mancalon bupati tu se, dak talok nyo lai manahan litak paruik. Jadi pulanglah nyo tangah hari tagang tu ka rumahnyo.

Baru tibo di laman, di pangka batang mangga muko rumahnyo, nampaklah dek Datuak Galinggang jeregen balirik-lirik jo masin pompa mode masin panyerak pupuak. Apo tu yo, tanyo Datuak Galinggang dalam hati sambia mandakek ka sinan. Lai ndak ado urang nan malatakkan nan indak-indak, beko kanai pinyakik urang di rumhnyo sadonyo, pikianyo sambia maangkek ciek jeregen.

Baru ka nyo hidu muncuang jeregan tu, tibolah Irna dari dalam sambia manenteng karateh ntah apa, tagalak-galak mancaliak Apanyo tu. “Ka Apa pangaan disinfektan tu tu?”

“Apo ko? Lai ndak racun ko?” tanyo Datuak Galinggang.

Baca juga :  Lamak dek Pak Wali Katuju dek Saku-saku Ambo...

“Iyo racun, Pa,” jawek Irna sambia galak taruih.

“Racun untuak a lo? Sia nan malatakkan siko ko?”

“Kan lah Irna kecekan tadi mah. Disinfektan. Racun untuak mamunah virus korona.”

“Baa lo kok sampai di siko ko disfektan ko?”

“Disinfektan, Apa….” kecek Irna, mambatuaan Apanyo.

“Tasarahlah apo namonyo. Kau nan mambawo ko kamari?”

“Pak Ongik nan malatakkan  siko tadi, Pa. Nyo pai kaliliang kampuang beko manyemprot jalan jo rumah-rumah urang sakampuang.”

Mandanga namo Ongik, mulailah tacium aroma-aroma kampanye dek Datuak Galinggang. “Lai indak dari Zulfiansah lo disfektan ko ko?” takoknyo.

Maangguak si Irna, “Iyo. Tau se Apa mah…”

“Tu baa kok di laman siko lo balatakkan?”

Bajalan si Irna ka dakek jeregen-jeregen tu. “Ko, caliak dek Apa dih…” Nyo tempel lah dek Irna stiker bagambar Zulfiansah di sado jeregen jo masin panyemprot tu.

“Ondeh, yo lah muak den mah. Ndak di kadai  dak di rumah. Si Zul ka si Zul se nan tibo taruih. Bawolah jauah-jauah alok kampanye kalian ko ka sinan lah. Kama se lah, asa jan di siko!” parintah Datuak Galinggang sambia bajalan masuak ka rumah. Dareh angoknyo dek manahan berang.

Baca juga :  Irna Curhat

“Manolong urang se indak ikhlas. Harus lo ado gambar awak di sinan. Yo bana urang-urang ko. Kampanye se pangana e nyo!” Baturo-turo surang Datuak Galinggang tibo di dalam. “Baa lah ka elok nagari ko bisuak ko, urang nan ka mamimpin se tu ha contohnyo. Alun mulai kampanye lai, lah nyo mulai maumbuak-umbuak urang jo semprot disfektan tu!”

Dek paruik alah lapa bana, samantaro si Irna masih di lua maagiah stiker ka jeregen-jeregen tu, tabiklah berang Datuak Galinggang, “Hoi Irna! Labiah paralu lo kau maurus si Zul tu daripado apak kau surang lai? Iko lah sajam den duduak siko, aie sagaleh se alun juo tahidang lai! Jan kan nasi lai!” Nyo hariak si Irna dari pintu.

“Iyo, Pa. Ko saketek lai ha. Tangguang karajo Iir!” jawek Irna.

“Den buang juo mah kasudahannyo sado jeregen tu!”

“Apa ko beraaang se taruih….” runguik si Irna sambia bajalan masuak.

“Baa kok  dak ka berang den dapek anak pamaleh mode kau! Apaknyo lah awih baliak dari parak, aie sagaleh se ndak taambiakan dek nyo doh. Urusan urang lain se nan bakarajoan!”

“Kan Irna mancari pitih balanjo dek Apa. Makonyo Irna manolong-nolong Pak Ongik jadi tim sukses Pak Zulfiansah…”

Baca juga :  Malam Minggu di Kadai Miso Tek Suna

“Jan manjawek juo kau lai!”

Alun rapek daun pintu tatutuik lai, tadanga lah dek Datuak Galinggang bunyi honda baranti di  muko batang mangga. Nyo bukak baliak pintu tu. E ruponyo si Iwan.

“Pak Ncu!” kecek Iwan. Turunnyo dari honda, tu langsuang bagageh ka manamui Datuak Galinggang.

“Eeee jauah-jauah se lah! Jan mandakek-dakek ka siko! Jago jarak aman!” Nyo stop Iwan sampai di laman se. “Ado apo?”

“Irna ado di rumah, Pak Ncu?” tanyo Iwan malu-malu.

“Lai! Baa tu?”

Iwan mandakek salangkah lai, “Iko, Pak Ncu. Patang Irna ka minjam buku ko. Tu wak antaan ka siko..”

“Jan mandakek jo ang lai kecek den! Mundur baliak!”

Mundurlah Iwan salangkah. “Mode urang bapinyakik se awak mah dek Pak Ncu…”

“Kan iyo ang UDP mah!”

“ODP baa lo kecek Pak Ncu ko. Awak lah dicek dan ndak ado apo-apo doh kecek dotor.”

“UDP kecek den! Ndak ODP doh!”

“UDP? Apo tu, Pak Ncu?” bakaruik kaniang Iwan.

“Urang Dalam Pengawasan!”

“Pengawasan baa lo mukasuik Pak Ncu ko? Kan awak alah….”

“Urang dalam pengawasan den! Gilo manggaduah Irna se karajo ang! Makonyo status ang den tetapkan sebagai UDP!”

Tadiam langsuang si Iwan. ***