Dicaritoan dek: Afri Meldam

 

Lah duo hari Iwan sakik paruik. Lah duo hari pulo inyo ndak masuak kuliah. Sapanjang hari (di antara ‘kegiatan’ ka jamban) nyo video kol jo Irna. Sabananyo Irna masih berang dek Iwan ngecek-ngecek baso Inggirih patang tu, tapi dek yayangnyo tu sadang sakik, tu luruah hati Irna.

“Lai ndak sasak angok abang?” Irna nan nio bana jadi dokter keceknyo tu batanyo ka Iwan soal sakik bebebnyo tu.

“Angok abang baik-baik saja nya…”

“Karungkungan abang ada enak rasanya?”

“Lai. Agak gatal-gatal sedikit sajanya abang rasa…”

“Abang salah makan agaknya ndak? Ingat-ingatlah dulu..Ada yang tidak-tidak yang abang makan atau abang minum?” Irna ko lah mode dokter yo bana lo batanyo ka si Iwan.

“Duo hari kapatang tu abang bali es tabu di muko Basko. Haus kali abang abis kuliah spiking…”

“Ada kemungkinan dek itu mah bang perut abang tu… Es batunya dari air matah mungkin?”

“Entahlah, Dek. Acap pula abang bali es tabu di sinan tapi ndak pernah sakik paruik doh…” kecek Iwan sambia mamacik paruik, siap-siap baliak ka jamban. “Tunggu sabanta, dek. Lah pengen keluar pula agaknya isi perut abang…”

“Pergilah cepat. Nanti tercirit di celana pula abang…”

Sambia manunggu babangnyo baliak dari jamban, talinteh dek Irna, lai ndak kanai pirus korona pulo si Iwan tu tu. Dek mangana tu, kancang lansuang datak jantuang Irna. Ndeeeh babang sayang calon imam Irna….

Pas lah nampak dek nyo baliak iduang si Iwan di layar hape, Irna lansuang batanyo, “Bang, ada abang bersua orang-orang dari luar negeri dalam seminggu ini?”

“Indak, dek…Eh tapi abang baru ingek…” nampaknyo pangana Iwan tabukak pas baliak dari jamban cako, jadi ndak nyo respon bana kecemasan Irna.

“Ingat apa, bang?” Dasak Irna.

“Abis wak telponan waktu tu, abang pai ka jeko. Panas hati abang mendengar kato-kato Apa Irna rasanya nan mengecekan abang ndak bisa baso Inggris…”

“Irna ndak ngarati do bang…Hubungannyo apo, bang?”

“Iya abang masih kuliah, tapi ndak seharusnyo Apa ngecek mode itu. Tu terpikir dek abang. Baa caronyo bia lancar lidah bang mangecek baso Inggris selain baraja…”

Irna masih madanga, ndak nio interupsi.

“Rasanya iya agak lama lancar bahasa Inggris ini kalau lidah kita tiap hari makan gulai jariang jo cubadak saja. Harus dicoba pula makanan urang Inggris tu..”

“Tu?” Irna masih lun nyambuang.

“Bang bali roti jo yogut di jeko Basko tu. Duo hari bang cubo makan jo itu se. Ndak makan nasi jo gulai jariang kesukaan abang…”

“Tu?”

“Hari partamo lai elok-elok se paruik bang nyo. Lapa-lapa stek nyo dek ndak bertemu nasi. Tapi hari kaduo…kalua isi paruik abang sadonyo…mamilin….bocor…”

“Hahaha” tapanca galak si Irna. “Tu lah abang tu. Dicoba pula gaya makan orang Eropa tu. Milin paruik abang jadinya sudah tu kan. Hahaha” nyo ndak stek alah e si Irna. Nyo galakan babang bebebnyo.

“Namanya juga abang berusaha, dek. Siapa tau ndak patah-patah lagi lidah abang pas spiking kalo tabiaso makan roti jo yogut tu.. ee taunya sakit perut yang abang dapatnya….”

“Kalau tahu Apa pasti tergelak besar Apa mendengarnya mah bang…”

“Jangan ceritakan pula ke Apa Irna…malu abang…”