Dicaritoan dek: Afri Meldam

Irna gadih jolong gadang, anak Datuak Galinggang, bungo baru kambang dari jorong Mudiak Banda, yo sabana santiang mambaco garik dunia. Baru kapatang nyo pandai babadak, kini lah taniek pulo dek nyo untuak mambuek video-video tutorial kecantikan. Yo, kalau istilah urang kini e, Irna ka mancubo pulo peruntungan manjadi vlogger.

“Eh, iko Irna anak Mak Datuak ndak? Ndeh lah gadih kamek se nampak dek Ni. Patang masih malap-lap salemo se karajo Irna, kini lah kuniang rancak!” Itu kecek Ni Yurmalis,  kamanakan jauah Apa e nan baru pulang dari Pakanbaru.

“Uni ko mancimeeh yo pandai bana,” jawek Irna wakatu tu manyuruakkan malunyo. Sabananyo tantu inyo sanang bana dipuji mode tu.

“Kok yo bana lah kini patuik bagarah-garah, mancimeeh-cimeeh bagai, tapi uni serius mah, Ir. Dak uni sangko Irna bisa sarancak iko dulu doh. Ndeh kok Uni sabuik lo malu Irna beko…” kecek Uni tu pulo. “Eh, takana dek Uni lai baminat Irna jadi-jadi vlogger mode anak-anak zaman kini? Di Pakanbaru, ado anak tetangga Uni, kamek mode Irna lo nyo, mungkin labiah kamek nyo stek, mambuek-buek video se karajonyo nyo. Tu nyo masuakan ka Yutub. Banyak pitih e. Lah nyo balian bagai Amanyo ameh!” Yo bana lamak masuak ota ko dek Uni Yurmalis.

Baca juga :  Takicuah di Nan Langang

Itulah nan mambuek Irna terinspirasi. Batua lo mah kecek Ni Yur tu, keceknyo. Awak ndak tau do kalau ndak dicubo. Ntah bisa lo den mambalian Ama ameh co tetangga Ni Yur tu, katonyo dalam hati siang tu sasudah basobok jo Ni Yurmalis.

Sanjo-sanjo, lah tibo Irna di rumah Ni Dar, maminjam kamera. “Elok-elok dih makai kamera ko. Ndak Apa bagai mambalian ko doh,” kecek Ni Dar, maagiahan kamera tu ka Irna.

“Pakai di rumah se dek Ir nyo, jan cameh lo lai.”

Malamnyo, Irna lah manyiapkan sado barang nan ka nyo gunoan untuak mambuek video tutorial tu. Rencananyo, untuak video partamo, nyo ka mambuek tutorial baa caronyo bia tetap rancak walaupun modal minim. “Cantik butuh modal? Hmm….pikir lagi deh. Kalau bisa dengan cara sederhana, kenapa pula harus keluar duit banyak-banyak. Nggak percaya? Nonton videoku sampai habis ya…” Irna lah mancatat kato-kato tu di karateh, dan nyo lah hapal di lua kapalo dek lah nyo ulang-ulang taruih. Namonyo pun ka nyo ganti jadi “Karina”di video tu bisuak, bia agak manjua stek, keceknyo.

Baca juga :  Irna Curhat

Bisuak nyo, salasai mandi, lah duduk Irna  di muko kamera. “Selamat pagi gaes, kenalkan aku Karina. Selamat datang di cenel aku…” Siap tu nyo ambiak badak bareh di ateh meja, “Nah aku biasanya pakai bedak beras ini nih gaes. Cara memakainya mudah saja ini nya. Ambil satu atau dua butir bedak, lalu letakkan di wadah. Beri sedikit air, henyak-henyakkan dengan jari sampai lumat dia, lalu tepuk-tepukkan ke muka. Jangan banyak-banyak benar ya…”

Nampaknyo ndak salah Ni Yur maagiah saran ka si Irna ko. Yo ado pulo nampaknyo bakat si irna ko manjadi vlogger. Ndak lamo, lah salasai dek nyo mambuek video tutorial tu.

Nyo puta baulang-ulang dek Irna. Lah nyo raso elok, nyo masuakan video tu ka Yutub. Nyo memang alah punyo akun juo dari dulu, cuma ndak pernah mamasuakkan videonyo surang.

“Bismillah. Mudah-mudahan banyak lah urang nan manonton video ko,” keceknyo katiko maunggah video nan nyo buek tadi tu.

Dek sinyal yo agak payah stek di kampuang, sampai takalok Irna di lantai barulah video tu mancogok di Yutub. Nyo agiah judul “Cantik ala Gadih Minang” dek Irna di video tu.

Mungkin ampia lo sajam Irna takalok di muko laptopnyo. Latiah nyo mungkin dek bakarajo dari patang manyiapan mambuek video tu. Pas nyo jago, nyo pareso cenelnyo, “Eh, lah ado nan manonton mah!”

Baca juga :  Taimpik Nak di Ateh , Takuruang Nak di….?

Ruponyo, dak manonton sajo doh, ado pulo nan alah manulih komentar di sinan. Baru duo komentar, tapi duo-duonyo padeh. Mambuek paneh si Irna se nyo.

Iko komentar nan partamo: “Video apaan sih. Gak jelas! Belajar ngomong dulu sono, baru bikin video!” Nyo baleh lansuang dek Irna: “Kamu nonton sajalah. Banyak pula komentar. Kita laki-laki tapi mulut seperti induk-induk!”

Nan kaduo, iko nan ditulih dek urang di sinan: “Lu mau ngasih tutorial kecantikan. Lu aja gak cantik!” Ka ubun-ubun darah Irna rasonyo mambaco komentar tu. Yo sabana kejam. Tu nyo baleh dek irna: “Coba kamu bertemu aku langsung, memanjat dinding tengah malam bisa kamu nanti jadinya. Jangan main-main pula sama gadis minang ini, kena hati kamu nanti…”

Sudah tu, nyo matian lansuang latop dek Irna. Baru sadar nyo kini, ndak salamak itu lo ruponyo doh manjadi vlogger ko. Nyo ambiak badak bareh nan masih tasiso tadi, tu nyo campakan ka lua jo tampek-tampeknyo sakali. Ka kasua jatuah aie mato Irna. ***