Dicaritoan dek: Afri Meldam

 

Malam alun galok bana, tapi Tek Suna alah bamanuang panjang di muko kadainyo. Baa ka indak, biasonyo lapeh mugarik mode kini yo subana bergedincit urang makan miso di kadainyo. Sampai ndak tamuek-muek bangku jo meja nan ado, bahkan menjalar pula ke bawah batang cubadak condong tu biasonyo.

Tapi kini caliaklah! Ndak bara incat pelanggan nan tibo doh. Itu pun harus taruih diingekan Tek Suna untuak duduak bajauh-jauhan, manuruikkan imbauan Pak Wali.

Duo malam kapatang sabananyo kadai misonyo masih rami, masih banyak urang mambali jo maota-ota jo bagunjiang sambia makan miso di sinan. Mulai dari nan gadih sampai ka nan alah dak bagigi, rami-rami bakumpua di kadainyo.

Katiko nyo sadang asiak manyanduak kuah miso malam kapatang tu, tibo lah rombongan Pak Wali ka sinan, manyuruah urang-urang mangirok capek-capek. “Baa kok masih bakumpua-kumpua juo lai ko? Lah baumumkan dari musajik Jumaik patang, ndak ado nan mandanga tu?” kecek Pak Wali sambia mausia urang-urang di sinan.

Baca juga :  Taimpik Nak di Ateh , Takuruang Nak di….?

“Baa Pak Wali ko? Ka musajik se kini urang ndak ado lai, sia lo nan ka mandanga pengumuman tu?” salah surang pelanggan Tek Sunan protes.

“Kan pakai spiker mah, Ngku pengumuman tu. Ado lo karateh imbauan di kadai-kadai bagai. Ko..ko ha. Di siko ado lo,” jawek Pak Wali sambia manunjuak karateh di dindiang kadai miso Tek Suna.

“Pokoknyo kini pulanglah dulu ka rumah surang-surang. Kok ndak kami dando bisuak lai!”

“Yayai yo, baa den ka cipitih lai ko…” rutuak Tek Suna dalam hati.

Sajak kanai razia dek Pak Wali tu, yo langang co kini lah kadai Tek Suna. Ciek duo nan tibo, mancilok-cilok makan miso bia ndak tatangkok dek Pak Wali.

“Baa aka lai ko. Lamo-lamo mode ko takaruak juo den mah!” pikia Tek Suna sambia mancaliak kuah miso nan masih panuah di panci.

Dalam pado itu, tibo lah baliak rombongan Pak Wali di sinan. Urang-urang tu agaknyo sadang kaliliang nagari, mamantau urang-urang nan bakeliaran.

Baca juga :  Jangan Main-main Pula Sama Gadih Minang ini, Kena Hati Kamu Nanti

“A tapek bana mah Pak Wali!” sambuik Tek Suna bagageh tagak.

“Iko masih rami urang di kadai nampak dek ambo,” kato Pak Wali.

Ka ulu ati Tek Suna pai kato-kato tu, “Rami baa lo kecek Pak Wali ko? Bakurang se indak kuah miso den do dari sanjo!”

“Kami indak malarang etek manggaleh doh. Tapi iko untuak awak basamo-samo…” diketekannyo suaronyo dek Pak Wali, mungkin takana dek nyo kalau induak-induak sadang protes ado-ado se nan ka dibueknyo.

“Tu baa rancaknyo dek Pak Wali lai. Tolonglah agiah jalan kalua bia samo-samo lamak awak. Jan lamak dek awak ketuju dek awak sajo…”

Bapikia Pak Wali sabanta. “Ndak baitu do, Tek…” keceknyo, “Kok manggaleh onlen se etek lu baa nyo?”

“Manggaleh miso ko onlen-onlen lo?” Lun tajangkau dek Tek Suna lai mukasuik Pak Wali.

“Iyo, etek nampak dek awak ado fesbuk pulo. Ha daripado buek-buek status, ancak etek galehan miso di sinan lai. Beko sia nan ka mambali bisa mamasan di fesbuk langsuang. Beko etek antaan ka rumah urang-urang tu lansuang…”

Baca juga :  Iwan Sakik Paruik

“Abih lo labo den dek mambali minyak honda mah Pak Wali!”

“Bara bana lah minyak ka abih dek maanta di kampuang ko se. Etek minta gai lah uang tip ka pelanggan miso etek.”

Tamanuang Tek Suna baliak. Nyo renung-inapkan saran Pak Wali tu. Ado batuanyo juo. “Tapi lai ka ado urang ka mambali dek Pak Wali bisuak tu?”

“Jan cameh etek lai. Bisuak kami tolongan umumkan kalau miso etek lah bisa dibali onlen kini.”

“Jan maota se Pak Wali lah. Buktikan lu. Pak Wali nan harus….”

Alun takilek lah takalam dek Pak Wali mukasuik Tek Suna. “Malam bisuak, kami parangkat nagari mamasan miso etek sacambuang surang. Ko ha pitihnyo ambia bayian kini…”

Mandanga tu, manih galak Tek Suna lansuang. Kambang kampih iduangnyo, “Itu baru lamak dek Pak Wali katuju dek saku-saku ambo tu…” ***