Oleh : AFRI MELDAM

Irna jo Iwan ko baru dua bulan pacaran. Irna baru tamaik SMA, samantaro si Iwan alah kuliah semester ampek di UNP. Tadi Iwan ko pulang kampuang, keceknyo ado paralu jo gaek e, padahal awak tantu tahu tujuannyo nio basobok jo pacarnyo tu. Dek kebetulan malam ko malam minggu, jadi kaduonyo lah sapakaik untuak pai makan miso di kadai tek Suna.

“Ada enak miso di kadai etek Suna tu, Dek?” tanyo si Iwan, seolah-olah nyo ndak pernah makan di sanan.

“Miso paliang enak di kampuang tu mah Bang. Cubolah dek Abang beko..” jawek Irna sambia galak-galak mode urang dapek buntuik.

“Aaa jadilah kalau baitu. Jam bara enaknya abang japuik adek beko?”

“Siap Mugarik lah, Bang. Tapi Bang minta izin ka Apa beko dulu dih…”

“Aman lah tu!”

Malamnyo, salapeh mugarik, honda Ninja Iwan lah mejeng di pangka rambutan muko rumah Irna. Lai bagak juo si Iwan ko, lai nyo tamui Apa si Irna ko langsuang.

“Elok-elok ang bawo anak den, Wan. Pai makan miso yo pai makan miso. Kok kama-kama ang bawo anak den beko, ang bayangkan se lah tenju den ko lakek di paruik aie ang tu!” pituah Apa si Erna sabalun malapeh anak gadihnyo ka kadai miso jo Iwan.

“Jadih, Pa. Aman lah…”

“Ba-Apa baa lo waang ka den ko. Aden ko alun mintuo ang lai. Panggia Pak Ncu se lah!” tabik juo berang Apa si Irna dek Iwan nan SKSD ko.

“Apah ko e…baa taka itu bana…” runguik si Irna.

“Den dak bisa bamanih-manih ka anak bujang doh! Lai danga dek ang tu, Wan?”

“Jadih, Pak Ncu!”

“Pai pai lah kalian capek. Beko tutuik kadai miso tu beko lai!” Nyo usianyo karewak nan baduo tu.

“Pak Ncu nitip dibungkuihan miso ndak?” Iwan masih bausaho maambiak hati Apa Irna.

“Miso lo ang asuangan ka den. Pizza dari Padang tu ang bawo agak duo loyang kamari!”

***

Mode kecek Irna, kadai miso Tek Suna yo lah tanamo di kampuang, jadi urang pun rami mambali. Untuang sajo Irna jo Iwan bisa manyalingkik di antaro urang-urang lain nan sadang makan miso di sinan. Dak lamo, pasanan pun tibo di meja. Sahampua miso tu, malimpah-limpah kuahnyo ka ateh meja. Nyo sabana porsi urang ndak makan saminggu.

Irna sabananyo lumayan lapa, karano tadi di rumah alun sempat makan (abis sumayang, nyo babadak lamo-lamo), tapi dek iko hari partamo nyo jalan jo Iwan, nyo tantu agak jaim stek. Ampek suok partamo nyo bae suok gadang (tapi tantu katiko Iwan dak mancaliak), tapi sudah tu nyo main-mainkan se sendoknyo di piriang miso tu.

“Kenapa adek mode urang patah selera begitu?” Iwan nan peka langsuang batanyo.

“Alah kanyang adek, Bang. Gadang kali porsi miso Tek Suna ini…” jawek Irna malu-malu.

“Abang sangko adek patah salero mancaliak salero abang tadi…” sadar juo Iwan ko ruponyo.

“Eeee manga pulo takah itu. Indak lah bang… cuma dek kanyang aja adek nyo..”

Pas bana katiko Irna sudah mangecek tu, Tek Suno datang mambarasiahan meja. “E ado Irna ruponyo..” nampaknyo beliau baru sadar kalau Irna alah di sinan dari tadi. Maklum pelanggan sadang banyak.

“Baa kok ndak habih miso Irna? Ndak lamak miso etek lai doh?” tanyo Tek Suno pulo.

Irna mangijok Tek Suna. “Hehee. Lah kanyang, Tek!”

“Ondeh. Patang Irna lantuang se miso etek nyo sudah wak makan balanjuang di musajik. Baa pulo kini Irna nyabuik lah kanyang?” Tek Suna ko yo agak blong rem muncuangnyo.

Irna mangijok Tek Suna sakali lai. Siap tu nyo arahan matonyo ka Iwan.

“Dek a Irna? Jan banyak gaya Irna lai. Abiahanlah miso tu capek. Beko dikecekan miso etek ndak lamak dek urang!”

“Etek ko e. Ndak tau dikijok urang.” kecek Irna sambia manyendok miso tu baliak.

Samantaro tu Iwan nan lah kakanyangan hanyo bisa tagalak sambia basanda di dindiang kadai.
“Santuang se lah, dek. Ndak baa bagai doh. Dak ba bakurang bagai cinta abang doh!”

“Lai ndak ilfil bang caliak Irna gadang salero?”

“Ee yayai yo. Lah dari dulu abang tau lai kalau Irna tu cama.”

“Abang ko e. Malu Irna jadinyo..”

“Malu Irna malu abang lu tu nyo…”

“Eeehei jan mamakak juo kalian siko lai. Capek lah abihan miso kau tu Irna. Beko den lapor ka Apa kau beko lai lamo-lamo juo kalian siko!”

Baca juga :  Jangan Main-main Pula Sama Gadih Minang ini, Kena Hati Kamu Nanti