Lah ampia sabulan lo Iwan di kampuang sajak nyo pulang dek takuik kanai pinyakik di Padang. Karajonyo kalau indak kuliah onlen yo main gim di komputer atau manonton film sapanjang hari sapanjang malam. Sasakali nyo kalua, pai raun-raun sabalik kampuang jo anak Datuak Galinggang, si Irna. Tapi sajak lah kanai kalasek dek Datuak Galinggang, lah bakuruang di kamar se karajo nyo lai.

“Iwan oi Iwan! Manga ang di kamar ka di kamar se ko co anak gadih. Pailah ka parak atau ka ladang tolong-tolongan Apa ang,” hariak Ama e sambia lalu dari dapua.

Untuang nak bujang tu ndak sadang pakai panyumbek talingo mandanga lagu, tapi masih sayuik-sayuik ka talingo Iwan kato-kato Amanyo tu.“Apo cek Ama ko ha? Ndak jaleh doh!”

Dek Amanyo lai ndak basumbek jo apo-apo talingonyo, tantu nyariang tadanga suaro Iwan ka lua. Paneh hatinyo mandanga Iwan manjawek mode tu, makonyo nyo tundo pintu kamar tu lansuang, “Kok dari siko den ngecek lai tadanga dek talingo ang tu? Tes tes ciek duo tigo tes tes!” Nyo singajoan dek Amanyo ngecek kareh-kareh.

Baca juga :  Irna Curhat

“Dek a ama ko? Mode urang baorgen lai lo nampak dek wak,” kato Iwan, mambaliak badan.

“Kini lai masih mode urang baorgen den nampak dek ang. Bisuak kok mode ko taruih se ang, mode anak STM bacakak bisa den mah!”

“Jo sia Ama ka bacakak?” tanyo Iwan pulo, bantuak ndak tau se masin Amanyo alah angek.

“Jo ang! Jo sia juo lai!”

“Awak ndak anak STM doh!”

“Ee…manjawek se ang!” Ampia nyo tokok kapalo si Iwan.

“Ampun Ama rancak…ampun Ama kuniang rancak!” Kalua kato-kato sakti Iwan, maumbuak Amanyo.

Mancaliak Amanyo ka kaco langsuang mandanga tu. Mangamek nyo saketek, tapi sadar nyo capek-capek. “Jan den lo ang umbuak-umbuak lai, Wan! Den tanyo ciek lu, lah sabulan ang di kampuang, apo se nan lah ang karajoan?”

“Baraja, buek tugas kuliah….”

“Dari jago lalok sampai tangah malam pakak baraja jo buek tugas se ang tu?”

“Yo, tu paralu lo refreshing sasakali dek Ama…”

“Dak sasakali nampak dek den doh. Presing-presing nan ka labiah nampak dek den nyo salamo ko!” Yo ndak bisa diumbuak kiro a lai Amanyo tu.

Baca juga :  Calon Parami Alek

“Tu a nan harus wak karajoan lai?”

“Dak nampak dang Apa ang ka ladang tiok hari? Ang tolong bagailah nyo di sinan!”

“Kan lah ado imbauan dari Pak Wali kalau ndak buliah kalua-kalua kini lu. Bakumpua-kumpua ndak lo buliah…” mancari-cari alasan si Iwan.

“Jo sia ang ka bakumpua-kumpua di ladang tu? Jo cigak? Jo cipan?”

“Tapi dek Ama….”

“Jan banyak-banyak alasan juo ang lai! Bisuak pagi kok ndak ang tolongan Apa ang, jan harok ang ka makan lamak!” ancam Amanyo.

Kalau lah mode tu Amanyo, Iwan tau kalau nyo sadang ndak bisa dipagarahan. “Jadih. Bisuak wak tolong Apa…”

“Awas se ang baduto!” kecek Amanyo sambia bajalan ka lua.

“Eee Ma, tunggu sabanta! Tanyo ciek!” takana dek Iwan tugas kuliah Budaya Minangkabaunyo.

“Apo lai?”

“Ko ado tugas wak. Budaya Minangkabau. Ndak ngarati wak doh..” kecek Iwan sambia mambuka komputer.

“Ndeh, dek ang jurusan baso Inggirih tu ndak ngarati se ang jo baso kampuang ang lai tu?”

Baca juga :  Takicuah di Nan Langang

“Ndak itu mukasuik wak doh. Iko ha. Manyambuang-nyambuang kalimat. ‘Taimpik ndak di ateh, takuruang nak di…’ A jaweknyo tu, Ma?”

“Takuruang nak dilampang! Itu se ndak ngarati ang doh?”

“Dilampang baa lo cek Ama ko?”

“Yo ang kalau takuruang mode kini mintak kanai lampang nampak dek den parangai ang!” Bagageh Amanyo kalua, maampehan pintu kamar Iwan kuek-kuek.

“Emosion se mah. Engri ka engri!” Kalua baso Inggirih Iwan. ***