Tangah hari tagang, katiko Sutan sadang siap-siap ka sumayang luhua, tadangalah lagu Ratu Sikumbuang dari hapenyo. Ruponyo si Tasman nan manalepon. Mudah-mudahan kaba elok lah nan ka disampaikan si Tasman ko, kecek Sutan maambiak hape tu. “Ha, apo kaba baiak nan tibo siang-siang ko ko?” tanyo Sutan mambuka kato.
Galak mancimeeh Tasman, “Angku yo bana. Salam bagailah dulu katiko manjawek talepon tu!” protesnyo ka Sutan.
“Tujuah kali tiok hari den mandoakan Angku salapeh sumayang. Komplen juo lai!” baleh Sutan.
“Ha, tu yo tu. Itu nan untuak awak nyo Ngku!”
“Jadi apo nan ka Angku sampaian kini ko? Den ko ka sumayang ha,” dasak Sutan co ka tapek wakatu taruih se nyo.
“Ondeh, lah batambah alim nampak dek den sajak musim pinyakik ko,” cimeeh Tasman.
“Jan banyak etong Angku lai. Sampaikan se lah mukasuik Angku capek kok ndak den tutuik talepon ko lai ha.”
“Iko, Ngku ha. Kapatang ko aden dapek tawaran dari mahasiswa nan kos dakek rumah. Katonyo ado kawannyo urang bule nan sadang mancari guru.”
“Guru apo?” potong Sutan capek-capek, masih alun ngarati arah barito Tasman.
“Bule tu ka baraja silek. Tapi sabalum tu nyo nio baraja baso Minang dulu. Den yo ndak bisa maaja urang doh, beko tasablon kapalonyo tu dek den. Payah kalau darah tengi ko. Makonyo takana Angku dek den. Baa lai bisa kiro-kiro? Angku dulu kan guru ngaji takana dek den…”
“Bule tu di ma?” Lah mulai tabukak pangana Sutan.
“Di negaranyo. Baraja di internet. Nan jaleh kini, Angku lai satuju atau indak? Beko bia den suruah mahasiswa tu manalepon Angku lansuang. Baa?”
Prinsip Sutan, rasaki ndak buliah diilakkan doh, apopun bantuaknyo. “Jadilah, Ngku. Den cubolah lu. Kan lai pakai dolar nyo ka manggaji den?”
“Aman lah Angku! Tapi jan lupo basahan lo sawah nan di bawah. Jan dilungok surang se bisuak rasaki tu!”
SINGKEK CARITO ditaleponlah Sutan dek mahasiswa nan dikecekan Tasman tu. Ruponyo bule nan ka baraja baso Minang tu urang Prancis. “Dia lagi di negaranya, Pak. Mungkin tahun.depan baru balik ke Jakarta. Makanya dia mau belajar online aja…Saya dengar dari Pak Tasman, bapak udah pengalaman ngajar ya?”
“O iya dulu sempat pula lah bapak mengajar di kampung,” jawek Sutan malu-malu.
“Ngajar apa, Pak?” ĺ
“Mengajar mengaji di surau. Tapi bahasa Prancis tidak bisa bapak, ada masuk tu?” tanyo Sutan.
“Iya, gak apa-apa. Yang penting Bapak bisa menjelaskan materi pelajaran dengan baik, kaya ngajar anak-anak ngaji gitu. Lagian teman saya itu udah lancar banget bahasa Indonesianya,” tarang mahasiswa tu nan mambuek lapang dado Sutan. Sajuak di dalam hati.
“Sesuai benar lah itu!” ampia tapakiak Sutan dek sanang.
Lah salasai mahasiswa tu manjalehan sagalo macam ka nyo, bakatolah Sutan, “O iya, Dek. Teringat pula oleh bapak satu. Kalau berguru di kampung, harus ada tanda yang dikasih ke guru sebelum belajar.”
“Ya, Pak?” Tantu bakaruik kaniang paja mahasiswa tu mandanga kato-kato Sutan.
“Iya, murid-murid bapak di surau bapak suruh bawa rotan sekerat seorang.”
“Jadi, teman saya harus ngasih rotan juga sebelum mulai belajar?” alun juo paham mahasiswa tu lai.
“Ada rotan itu di Prancis kira-kira tu?” tanyo Sutan pulo.
“Kayanya sih nggak ada, Pak. Di Jakarta aja nggak ada.”
“Nah maka itu. Kalau tak ada rotan, pitih pun jadi juga…”
“Oo pitih! Duit maksud bapak? Bayar DP gitu ya?” tatongkok juo dek mahasiswa tu mukasuik Sutan nan babalik-balik tu. Acok makan di kadai nasi urang awak nampaknyo paja tuh.
“Tepat benar!”
“Oalah. Bilang dong Pak dari tadi! Soal duit pokoknya aman, Pak!”
“Suka sekali bapak tuh kalau seperti itu!” *

Baca juga :  Iwan Sakik Paruik