Dicaritoan dek: Afri Meldam

 

Jam makan siang, Sutan, mamak kanduang Irna nan tingga di Jakarta, sadang singgah di pujasera dakek tampeknyo ka basobok jo klien. Nyo ndak lapa-lapa bana lo sabana e doh. Soalnyo ka barangkek tadi lah nyo sungkah nasi jo samba jariang duo piriang balanjuang. Tapi dek lamo di jalan, dan ndak lamak juo dicaliak ereng dek urang manggaleh di sinan kalau nyo duduak-duduak co baruak gaek se, bakaliliang lah inyo di sinan, mancari apo ka dimakan.

Pujasera agak langang siang tu. Mungkin dek imbauan mengenai korona patang, jadi urang-urang maleh kalua rumah. Mungkin dek itu pulo, urang-urang nan manggaleh di pujasera tu mode urang barabuik pelanggan se. Tibo urang ciek, barabuik nyo maosongan menu e surang-surang. “Yo Ni. Ko sadang bapikia ha,” kecek Sutan ka urang-urang manggaleh nan manyasak tu.

“Soto tangkar kita paling enak lho Pak di Jakarta!”

“Boleh, Pak, gado-gadonyo…”

“Nasi rames, ati ayam ampela, komplit, pak..”

“Jadi jadi, pusing saya jadinya ini. Nanti saya pesan langsung kalau saya sudah tahu mau pesan apa” keceknyo pulo.

Sutan sabana e maleh bana samo urang-urang manggaleh nan agresif co itu. Kok yo lamak galehnyo, pasti ndak ka kurang pelanggan nyo tu doh, walaupun sadang langang mode kini. Tapi kok mancari pambali sinan kamari, artinyo ndak lamak tu doh, baitu teori Sutan salamo ko.

Baca juga :  Calon Parami Alek

Jadi, sambia bapikia, duduaklah Sutan di meja agak di suduik. Indak lamo sudah nyo duduk tu, tibolah ibuk-ibuk manatiang sacambuang gadang makanan ka dakek nyo. Pas maanyakkan pasuik, ibuk-ibuk bagincu taba tu lansuang manyungkah makanan di piriang nyo tu mode urang ndak makan duo bulan. Yo bana co jawi sudah mambajak sawah sakampuang etek tu manyendok.

“Ondeh, lamak bana nampak nyo e nan dimakan etek tu..” kecek Sutan dalam hati.

Dicigok-cigok jauah dek Sutan makanan tu. Dari bantuaknyo, agaknyo nan dimakan etek tu ndak makanan barek doh, tapi makanan kudok-kudok sajo. Pas bana mah untuak mangganja-ganja paruik sabalunmakan jo klien beko. Tapi apo namo makanan tu yo?

Nyo cigin sakali lai dek Sutan cambuang etek tu. Putuih bauleh sendoknyo masuak ka muluik. Tadanga lo capak a sasakali. Sutan nan ndak lapa-lapa bana pun jadi lapa yobana dibueknyo.

Ka batanyo ka etek tu, tantu dak lamak doh. Iko Jakarta, bukan pasa Lintau. Di siko awak mangamek se kadang curiga urang ka awak. Disangko tukang hiptnotis lah beko, agen MLM lah, bamacam-macam.pokoknyo. Apolai kini sadang musim pinyakik. Harus jaga jarak jo urang-urang.

Baca juga :  Irna Curhat

Dek paruik lah tambah lapa se mancaliak etek tu makan co jawi, pailah Sutan mancaliak-caliak sakali lai. Dek untuang elok, basobok lah dek nyo kadai nan manjua makanan tu. Baru takana dek Sutan, makanan tu namonyo cakwe. Dulu pernah nyo makan ko jo bininyo di Banduang.

“Berapa ini satu? Bisa beli setengah cambung saja?” Walaupun lah ampia limo tahun marantau, nan lidah Minang Sutan ko yo sabana taba. Kental benar santan kelapa di urek darahnyo.

“Satu porsinya tiga puluh ribu, Pak.” Jawek tukang galeh.

“Tadi saya tanya, bisa beli setengah cambung?” Diulang dek Sutan batanyo.

“Maksudnya setengah porsi ya, Pak?”

“Iya. Itu kan dicambung kami taro itu. Makanya saya bilang setengah cambung…”

“Maaf, Pak. Harus satu porsi. Di komputernya udah tersistem begitu soalnya…”

“Iyalah. Ambilkan satu porsi. Nanti sausnya tambah sedikit ya…”

“Baik, Pak.”

Dek lah tabiaso, subana capek paja tu maambiakkan pesanan Sutan. Tapi lah nyo tarimo makanan tu, nampak dek Sutan isinyo ndak sabanyak nan dimakan etek-etek tadi. Beda pulo jo nan di foto bantuaknyo.

Dek lapa, duduaklah Sutan di meja dakek kadai tu. Lansuang nyo suok gadang-gadang cakwe tu. “Eeee baa kok co kajai rasonyo ko…liek-liek ndak bakantuan se..”

Baca juga :  Parangai Si Iwan

Nyo cubo sasuok lai, nyo ambiak potongan nan lain. E samo se. Liek. Lari-lari nyo digigik. “Yo jawi bana etek-etek tadi. Baa lo makanan co kajai ko nyo makan sampai bacapak gadang tadi tu!”

Duo suok tu se nyo, sudah tu ilang salero Sutan. Ka nyo campakan cakwe tu, tapi tapikia dek nyo pitih tigo puluah ribu. Mungkin bisa digoreng baliak di rumah beko mah. Mintak bungkuih se lah…

Baliaklah Sutan ka kadai tadi. Nio protes, tapi gengsi nyo labiah gadang. “Mas, makanannya dibungkus saja ya.”

“Oo mau dibungkus ya, Pak. Tunggu ya… Maa…maaa…tolong dong..”

Dari balakang kadai, tibo surang etek-etek ka sinan “Kenapa, dek?” Keceknyo ka paja bujang tadi.

“Ini Ma. Bapaknya mau takeway!”

“Oh boleh. Sini, Pak makanannya…”

Ndak salah lai. Itu etek-etek nan makan co jawi tadi! Ruponyo inyo nan punyo kadai ko. Patuiklah makanan raso kajai se nyo makan sampai bacapak-capak! Promosi lo nyo ruponyo tadi!

Ndeh, lah takicuah Sutan!

“Jawi!” Kecek Sutan agak kareh.

“Ya, Pak. Kenapa?” tanyo etek-etek tu. Tantu nyo ndak tau baso Minang.

“Ah tidak. Hebat pula ibuk membungkus nampaknya…” ota Sutan.

“Ah bapak bisa aja…” (***)